Алиу ги истакна напорите на здравствените служби во критичните часови по трагедијата, посочувајќи го значајниот третман и рехабилитација на повредените. Тој упати искрена благодарност до над 400 здравствени работници од јавниот и приватниот сектор, кои, како што нагласи, со исклучителна посветеност и професионалност вложија натчовечки напори за спас на животи.
„Вашата професионалност, солидарност и хуманост ќе останат длабоко запаметени. Во моменти кога секоја минута значеше надеж, вие сте биле вистински партнери во борбата за секој човечки живот“, истакна Алиу.
Во првите денови, многу тешко повредени пациенти беа транспортирани во странски здравствени установи. Алиу изрази благодарност и до медицинските тимови во европските здравствени центри, нагласувајќи дека меѓународната солидарност потврдиле дека стручноста и хуманоста немаат граници во спасувањето на човечки животи.
Министерот додаде дека заедничката координација со главниот кризен штаб, како и со штабовите во Министерството за надворешни работи и Министерството за внатрешни работи, овозможила ефикасна и брза реакција. Благодарение на воспоставената интероперабилност, 115 пациенти беа безбедно упатени на лекување во европски клиники.
„Во услови кога секоја одлука требаше да биде навремена и прецизна поради животната важност, институциите дејствуваа координирано и одговорно“, истакна тој.
Алиу исто така говореше за долгорочните последици од трагедијата во Кочани, нагласувајќи дека освен физичките повреди, остануваат и сериозни психолошки трауми кај повредените, нивните семејства и во заедницата. Поради тоа, психолошката и психо-социјалната поддршка била третирана како неопходен дел од здравствениот одговор.
Според него, искуството открило потреба за дополнително јакнење на капацитетите за третман на тешки изгореници, масовни несреќи и долготрајна рехабилитација. На крајот, министерот подвлече дека најголемата обврска кон жртвите и повредените е континуираното унапредување на здравствениот систем.
