Фудбалерите на Манчестер Сити извојуваа импресивна победа од 4-0 против Њукасл во дербито од 25. коло на Премиер лигата.
Главен јунак на натпреварот беше новото засилување на „граѓаните“, Омар Мармуш, кој пристигна во јануарскиот преоден рок за 75 милиони евра. Египетскиот напаѓач блесна со хет-трик, постигнувајќи три гола во периодот од 19. до 33. минута и практично го реши победникот уште во првото полувреме.
Посебно впечатлив беше неговиот прв гол во дресот на Манчестер Сити – голманот Едерсон ему испрати долга топка, а Мармуш со префинет лоб удар го совлада голманот на Њукасл, оставајќи ја одбраната на „страчките“ без реакција.
Крајниот резултат го постави Џејмс Мекати, кој погоди по асистенција на Ерлинг Халанд. Норвежанецот,сепак,го загрижи Пеп Гвардиола и навивачите на Сити откако во самиот финиш на натпреварот почувствува болка во коленото,без претходен контакт со противнички играч. Останува да се види колку е сериозна неговата повреда.
Со оваа победа, Манчестер Сити се искачи на четвртото место на табелата, додека Њукасл сега се наоѓа на седмата позиција.
Во останатите натпревари од колото:
Фулам – Нотингем Форест 2:1
(Смит Роу 15, Бејси 62 – Вуд 37)
Саутемптон – Бурнемаут 1:3
(Сулеман 72 – Утар 14, Кристи 16, Таверние 83)
Вест Хем – Брентфорд 0:1
(Шаде 4)
Манчестер Сити сега се насочува кон следниот дуел, каде ги очекува тежок тест во трката за врвот на Премиер лигата.
