Европската комисија треба официјално да претстави план за изградба на брзи железнички линии низ Европа до крајот на месецов, а деталите за овој план полека се откриваат.
Европската комисија треба да го претстави планот на 21 октомври, изјави Алберто Мацола, извршен директор на Здружението на европски железнички и инфраструктурни компании.
„Го ставаме железничкиот транспорт на врвот на нашите приоритети. Сметаме дека овој план е одржлив“, рече Мацола.
Се очекува планот што ќе биде презентиран да чини вкупно 546 милијарди евра и да трае 20 години за да се изгради.
Целта е да се поврзат големите градови низ европскиот континент со брзи железнички линии, а покрај земјите од ЕУ, ќе бидат вклучени и земји како Украина, Турција и Обединетото Кралство.
Според Мацола, парите за овој проект би можеле да дојдат од европски и национални фондови, како и од заедничкиот фонд за одбрана на Европската Унија, во сегментот за инфраструктурни проекти.
Вкупната должина на линијата би била повеќе од 49.000 километри, а се очекува возовите да можат да патуваат со брзина од 250 километри на час. Така, според планот, патниците ќе можат да стигнат од Истанбул до Атина за 4 часа.
Исто така, се очекува дека главните градови ќе бидат поврзани први, а потоа градовите со повеќе од 250.000 жители.
