Државниот врв вчера држеше говори на најголемиот македонски национален и државен празник – ИЛИНДЕН, далеку од народот, со силно полициско обезбедување и одбрани гости, оценуваат од Демократскиот сојуз.
Според партијата, празникот бил злоупотребен за да се убедуваат граѓаните и опозицијата дека треба да се изгласаат уставните измени.
„Имаше обид да се злоупотреби овој светол празник, да се повикува на илинденците и на востанието за наводно да покажеме и сега храброст за да се промени Уставот, за Македонија да ги почне преговорите за влез во ЕУ.
Многу е несоодветно било кој да се споредува со илинденците или со партизаните и да се повикува на народот,
истовремено да се бега од народот или да се направи нешто што 80% од народот не го прифаќа“, оценуваат од Демократски сојуз.
Од партијата потенцираат дека неспорно е дека членството во ЕУ е наш национален, стратешки и државен интерес, но, велат, „токму државниот врв нѐ заглави на тој пат, со прифаќање на неприфатливи услови, со коленичење и сервилност, без консултации со народот, без стратегија и поширок политички консензус“.
Од партијата повторно повикаа на предвремени избори.
„Доколку сакате да водите исправни политики, да спроведувате реформи и да создавате услови за подобар живот за сите граѓани, тогаш организирајте парламентарни избори.
Барајте поддршка, не бегајте, не се сокривајте од народот!
Со политички блефови, театар, манипулации и злоупотреба на историските настани, нема да победите ниту ќе направите реформи, а уште помалку ќе обезбедите сплотеност и единство. Ќе ‘купите’ некој ден повеќе да бидете на власт, но народот ќе ве казни!“, се наведува во реакцијата.
Национален, државен и граѓански интерес е да се организираат избори и да се проверат политиките кои се нудат, категорични се од Демократски сојуз.
