На денешен ден, 18 мај 1979 година, во Скопје е роден Благој Нацоски – еден од најуспешните и најпризнати македонски оперски пејачи, чии уметнички подвизи веќе над две децении блескаат на меѓународната сцена и во најпознатите оперски куќи во Европа и светот.
Израснат во музичко семејство, Нацоски од рана возраст ја покажува својата страст кон музиката. Своите први вокални чекори ги прави со мајка си, Лидија Нацоска, а потоа продолжува образованието во Музичката школа „Илија Николовски-Луј“ во Скопје. По завршувањето на средното образование, заминува во Италија за дополнително усовршување со врвни педагози и уметници, и во 2003 година дипломира на Конзерваториумот „Личинио Рефиче“ во Фросиноне.
Неговото прво појавување на сцената на Римската опера во 2003 година, во улогата на Артуро во „Лучија од Ламермур“, претставува важен момент во неговата кариера. Оттогаш, Нацоски настапува во престижни театри во Рим, Џенова, Цирих, Брисел, Штутгарт, Токио и Варшава, создавајќи незаборавни моменти во светската оперска сцена.
Тој е особено препознатлив по своите интерпретации на делата на Моцарт, Росини и Доницети, каде што со својот лирски тенор, музикалност и сценска елеганција оставил силен впечаток кај критиката и публиката. Во текот на својата кариера, ги толкува улогите на Дон Отавио, Ферандо, Тамино, Алмавива и многу други, соработувајќи со познати диригенти и режисери.
Во 2014 година, со улогата на Александар Македонски во операта „Кралот пастор“ од Моцарт, поставена во театарот „Верди“ во Трст, привлече посебно внимание.
Покрај многубројните настапи и признанија, Нацоски е носител на неколку меѓународни награди и од 2008 година е македонски амбасадор на културата во Италија. Неговото име се наоѓа и во регистарот на италијанското Министерство за надворешни работи за личности што ги промовираат италијанската култура и јазик низ светот.
Со својата кариера, Благој Нацоски е еден од најзначајните културни амбасадори на Македонија, достојно претставувајќи ја земјата на светските оперски сцени.
Редакцијата му го честита роденденот и му посакува уште многу успеси и нови блескави улоги на глобалните сцени.
