Еден од најдобрите македонски актери, Емил Рубен, денес го слави својот 78. роденден. Роден е на 17 јули 1948 година во Скопје и оставил неповторлива трага на сцената на Македонскиот народен театар, како и во македонската кинематографија.
Со актерството започнал уште во детството. На шестгодишна возраст ја добил својата прва улога како малиот Жарко во филмот „Тие двајцата“ на Жорж Скригин, чија премиера се одржа во 1955 година. Во следните години, играше главни улоги во филмовите „Малиот човек“ и „Бунт на куклите“, станувајќи едно од најпознатите актери во Македонија.
По завршувањето на образованието во Скопје и Загреб, дипломирал на Академијата за филм и театар во Загреб во 1971 година. Во истата година стана дел од ансамблот на Македонскиот народен театар, каде изгради една од најзначајните актерски кариери во македонскиот театар.
За време на својата кариера, која трае повеќе од пет децении, Емил Рубен одигра многу незаборавни ролји во претстави како „Буре барут“, „Македонска крвава свадба“, „Балканот не е мртов“, „Црнила“, „Сомнително лице“, „Мајсторот и Маргарита“, „Галеб“, „Сите сме птици“. Денес, и натаму е активен член на МНТ, настапувајќи во новите продукции на националниот театар.
Тој остави значаен белег и во филмската индустрија. Неговата филмографија вклучува повеќе од триесет филмови и телевизиски проекти, меѓу кои „Истрел“, „Јазол“, „Марика лета со авион“, „Збогум на 20. век“, „Бал-кан-кан“, „Големата вода“, „Трето полувреме“, „Лазар“, „Македонија“ и многу други, потврдувајќи ја својата актерска разновидност и способност да создава автентични ликови.
Неговата посветеност на македонската култура е наградена со многубројни признанија. Меѓу нив се наградите „13 Ноември“ (2001), „Петре Прличко“ (2007), „Димче Трајковски“ за епизодна улога (2013), како и престижната награда „Војдан Чернодрински“ за животно дело, која му беше врачена во 2021 година.
Со професионализмот, достоинството на сцената и бројните незаборавни улоги, Емил Рубен е еден од столбовите на македонското глумиште, а неговиот придонес е трајно врежан во историјата на македонскиот театар и филм.
Редакцијата на „Екран“ му честита на Емил Рубен за роденденот, посакувајќи му многу здравје, лична среќа и уште многу успешни улоги.
