Британската влада ја потврди својата посветеност на слободата на говорот
Британската влада објави дека е „целосно посветена на почитување на правото на слобода на говор“, откако директорот на Центарот за сузбивање на дигитална омраза, Имран Ахмед, доби забрана за влез во Соединетите Американски Држави. Ахмед е еден од петте европски државјани санкционирани од администрацијата на поранешниот американски претседател Доналд Трамп, поради нивната улога во ограничувањето на слободата на изразување на американските дигитални платформи.
Американскиот државен секретар, Марко Рубио, изјави дека санкционираните лица предводат иницијативи за „присилување на американските платформи да санкционираат ставови кои не им одговараат“. Тој најави дека ваквите мерки можат да се проширaт и на други политичари или функционери.
Имран Ахмед, кој потекнува од Манчестер, е познат по тесната соработка со високи функционери на Лабуристичката партија. Во минатото, работел како советник за поранешниот министер за надворешни работи во сенка, Хилари Бен, кој сега е министер за Северна Ирска. Центарот за сузбивање на дигитална омраза претходно го водел Морган МекСвини, актуелниот шеф на кабинетот на британскиот премиер Кир Стармер.
Портпаролот на британската влада изјави дека Обединетото Кралство останува цврсто посветено на заштитата на слободата на изразување, но истовремено поддржува закони и институции кои се борат против најштетните содржини на интернет. Посочи дека социјалните мрежи не смеат да се користат за ширење на содржини поврзани со сексуална злоупотреба на деца, поттикнување на омраза и насилство, како и за дезинформации.
Независниот британски рецензент за законодавство поврзано со тероризмот, Џонатан Хол, оцени дека овие американски санкции се „значаен чекор“ и предупреди дека можат да имаат застрашувачки ефект врз другите кои активно дискутираат за регулирањето на дигиталниот простор.
Во октомври 2024 година, милијардерот Илон Маск јавно го нападна Центарот за сузбивање на дигитална омраза, нарекувајќи го „криминална организација“. Ахмед одговори дека ќе продолжи да работи на својата мисија. На списоток на санкционирани е и Британката Клер Мелфорд, што раководи со Глобалниот индекс за дезинформации.
Од американска страна беше истакнато дека администрацијата на Трамп нема да дозволи „екстериторијална цензура“. Рубио на социјалните мрежи напиша дека САД ќе се спротивстават на обидите на странски актери да влијаат на слободата на изразување на американските платформи. Заменичката државна секретарка за јавна дипломатија, Сара Роџерс, потврди дека иако санкционираните не се актуелни функционери на Обединетото Кралство или Европската Унија, постојат знаења дека странски влади ги целат Соединетите Држави.
Покрај Ахмед и Мелфорд, на списотот санкционирани се и поранешниот европски комесар Тиери Бретон, како и Ана-Лена фон Ходенберг и Жозефин Балон од германската невладина организација HateAid. Претседателката на Европската комисија Урсула фон дер Лајен и претседателот на Европскиот совет Антонио Кошта нагласуваат дека Европската Унија ќе се бори за слободата на говорот, оценувајќи ја одлуката на Вашингтон како неприфатлива за сојузниците.
Францускиот претседател Емануел Макрон остро ги осуди санкциите, обвинувајќи ги Соединетите Држави за застрашување и притисок со цел да се поткопа европскиот дигитален суверенитет. Тој истакна дека правилата за дигиталниот простор на Европската Унија не можат да бидат донесени надвор од Европа и нагласи дека Франција, во соработка со Европската комисија и европските партнери, ќе продолжи да ја брани регулаторната автономија на Унијата.
