Државата ќе се погрижи да се обезбедат добри услови за повратниците од други земји, кои ќе мора да останат во државен карантин најмалку 15 денови. Министерот за надворешни работи, Никола Димитров, вели дека засега рано е да се каже во кои објекти ќе бидат сместувани овие лица, но, ќе бидат од еден до двајца во соба.
„Владата формираше работно тело, каде е вклучен генералниот секретар на Владата и неколку министерства со свои членови. Ние ќе направиме се што може условите да бидат добри и да се грижиме за здравјето на луѓето кои ќе се враќаат. Така ќе биде организирано доставувањето на храна, дезинфекцијата, чистењето. Луѓето од државниот карантин ќе бидат еден до двајца во соба, меѓутоа рано е да се каже и колку е корисно да се каже каде тоа ќе бидат. Има државни објекти, има хотели во приватна сопственост кои се понудени на државата за вакви ситуации“, кажа Димитров.
Според него, важно е да се заштити здравјето на целото население, но и да се подигне капацитетот на државниот карантин, со оглед дека досега се знае дека околу 2300 лица се заглавени во држави ширум целиот свет.
„Важно е да го подигнеме капацитетот за државен карантин, да направиме се што можеме условите да бидат добри за здравјето на тие луѓе, за да го заштитиме здравјето на целото население“, посочи Димитров.
Претходно, министерот Димитров сооптши дека македонски државјани заглави во Истанбул одбиле да се качат на организиран лет на македонското Министерство за надворешни работи во договор со Црна Гора, откако им било кажано дека ќе бидат во задолжителен групен карантин.
