Во своето обраќање на конференцијата „Седум децении подоцна: Од визијата на Шуман до новите геополитички предизвици на Европа“, претседателот на СДСМ, д-р Венко Филипче, изрази сериозна загриженост за курсот што власта го презема и предупреди дека државата е на пат кон задолжничко ропство. Според него, актуелното задолжување не е прашање само на бројки, туку и на недостаток на реален економски напредок.
Филипче истакна дека без вистинска европска интеграција, не може да се очекуваат значајни реформи, развој или финансиска стабилност. Тој нагласи дека невозможно е да се постигне напредок во секторите, да се обезбедат грантови или неповратни средства ако не се реализираат вистински чекори кон Европската Унија.
„Задолжувањето расте со алармантно темпо, а тоа е дополнителен фактор за безбедноста и иднината на државата. Ќе имаме проблеми со враќањето на кредитите. Само за две години, долгот е зголемен за две милијарди,“ рече Филипче.
Тој дополнително посочи дека власта неконтролирано се задолжува и новите кредити не се насочуваат кон капитални инвестиции, при што нема напредок во клучните области.
„Тоа не се капитални инвестиции кои би предизвикале раст. Нема прогрес во ниту еден сектор. Меѓуетничките односи се влошуваат. Албанија напредува. Во времето на владеењето на СДСМ, никогаш не сме имале заострени меѓуетнички односи. За тоа имаше основа, бидејќи граѓаните беа на прво место, а не партиските интереси,“ заклучи Филипче.
