Откако најави негово разрешување, а овој јавно му врати да не ја злоупотребува владината говорница, министерот Венко Филипче јавно му се обрати на директорот на Центарот за јавно здравје Арбен Зибери, овојпат преку Фејсбук, порачувајќи дека го цени неговиот придонес, но и дека нема да дозволи политичко поентирање на сметка на епидемијата:
„Директоре Зибери,
Tоа што сте во изборна кампања не ви дава за право да изнесувате невистини и да ја поткопувате работата и одлуките на Комисијата за заразни болести. Четири месеци градиме доверба и работиме транспарентно. Во ниеден момент не донесовме политички мотивирани одлуки и ова вие добро го знаете.
Вашата изјава е неточна, штетна и пред сѐ неколегијална, што исклучително ме загрижува. Моја должност како министер, меѓу другото, е да го штитам угледот на колегите од комисијата и нивните стручни одлуки. Верувам дека разбирате каква штета нанесувате во овие чувствителни моменти кога заеднички се бориме за иста цел. Го ценам придонесот на сите кои се борат со епидемијата, вклучително и вашиот, но нема да дозволам политичко поентирање на сметка на епидемијата“, напиша Филипче (комплетната приказна ТУКА).
