На пазарот на криптовалути повторно владее оптимизам, откако цената на биткоинот неодамна се задржа над 80.000 долари, по подолг период на нестабилност. И покрај тоа што во текот на последната недела цената падна под оваа граница, биткоинот успеа да се стабилизира нешто под ова психологичко ниво. Инвеститорите со внимание ги следат движењата на глобалните финансиски пазари.
Аналитичарите истакнуваат дека криптосекторот е силно зависен од моменталната атмосфера на берзите и подготвеноста на инвеститорите да преземаат ризик. Во последно време значителен дел од капиталот и интересот се насочија кон компании и акции поврзани со вештачката интелигенција. Сепак, експертите предупредуваат дека финансиските пазари функционираат во циклуси и враќањето на интересот за криптовалутите може да биде само прашање на време.
Во меѓувреме, високите каматни стапки и растот на цените на нафтата создаваат дополнителни инфлаторни притисоци и неизвесност на пазарите. Со тоа, вниманието е насочено и кон СпејсИкс, компанијата на Илон Маск, која, според достапните документи, поседува биткоини во вредност од околу 1,45 милијарди долари. Компанијата уште во 2021 година го впиша биткоинот во својот биланс, а на крајот на декември имаше 18.712 биткоини, купени за приближно 661 милион долари. Оваа количина останала непроменета до крајот на 2024 година, со што СпејсИкс се позиционира меѓу десетте најзначајни корпоративни сопственици на биткоини во светот.
Информациите укажуваат и на тоа дека Комисијата за хартии од вредност на САД разгледува можноста да дозволи платформите од трети страни да токенизираат акции без директно одобрение од издавачите. Според известување на Блумберг, ваквото решение би можело да доведе до значајни промени во досегашните правила на американскиот регулатор и да отвори нови можности за токенизирани хартии од вредност.
