Израелскиот министер за внатрешна безбедност Итамар Бен Гвир денеска се извини откако неговиот син на социјалната мрежа Х го исмеваше американскиот претседател Џо Бајден, наведувајќи дека боледува од Алцхајмерова болест.
„Шавуел е мој син и јас го сакам, но синоќа направи сериозна грешка со твитот што воопшто не го одобрувам“, напиша Итамар Бен Гвир на X. „САД се нашиот најголем пријател, а претседателот Бајден е пријател на Израел“, додаде министерот.
Нема место за „навредливи“ изјави, рече тој.
Осумнаесетгодишниот Шавуел Бен Гвир синоќа објави фотографија од 81-годишниот Бајден, придружувајќи ја со коментар дека е „важно да се подигне свеста“ за Алцхајмеровата болест, „која е најчеста причина за когнитивно опаѓање и деменција кај постарите лица“.
Објавата потоа беше избришана, а Шавуел им се извини на своите околу 2.800 следбеници.
Итамар Бен Гвир е министер во владата на израелскиот премиер Бенјамин Нетанјаху – една од најдесно ориентираните во историјата на Израел. Лидерот на партијата Еврејска моќ често дава скандалозни, а понекогаш и исмејувачки изјави.
