„Русковска како доказ доставила вештачење од невропсихијатар во кое пишувало дека кај неа има лутина кон тужените, анксиозност и загриженост. Нека ѝ каже некој дека нема граѓанин во Република Македонија што не го осеќа истото кон неа, а сигурен сум дека не би било лага ако кажам дека и многу повеќе! И не само кон неа, туку кон сите кои се дел од мафијата. Можеби е добро сите да поднесеме тужби, м? 😉 “, пишува доскорешниот генерален секретар на ВМРО-ДПМНЕ – Игор Јанушев, на Фејсбук, по вчерашното подготвително рочиште за тужбата на шефицата на Јавното обвинителство за гонење на организиран криминал и корупција, против ВМРО-ДПМНЕ, за тоа што ја злоупотребиле во политичките спотови во предизборната кампања.
Според Јанушев, тоа што главната обвинителка чувствува страв и лутина кон ВМРО-ДПМНЕ, значи дека „сериозно е доведена во прашање нејзината објективност во работењето, што пак е основен принцип на работа за еден обвинител“.
„ … И кога говори за нејзините чувства, нека се запраша за чувствата на оние мајки, сестри, родители чии чеда неправедно ги гони и се под политички прогон. Паричката има две страни, нели обвинителке?“, додава Јанушев во постот.
Русковска ги тужи партијата ВМРО-ДПМНЕ, коалицијата „За обнова на Македонија“, Јанушев (како овластен претставник на партијата) и Христијан Мицкоски (како лидер на партијата), и од нив бара 10.000 евра оштета, за која најави дека ќе ги донира во хуманитарни цели. Русковска тужбата ја најави уште во текот на предизборната кампања, кога до ВМРО-ДПМНЕ и коалицијата испрати опомена и побара од нив да го повлечат спотот насловен „Криминална вистина“, но и да ѝ се извинат толку пати колку што бил прегледан (во моментот кога 365.com.mk ја објави таа вест, спотот само на YouTube имаше над 11 илјади прегледи).
Како што се вели во вештачењето што Русковска го приложила заедно со тужбата, двата телевизиски спота (вториот е „Штанд на лагите“) кај обвинителката предизвикале загриженост, анксиозност и душевна болка. Нејзиниот адвокат истакна дека во спотовите на ВМРО-ДПМНЕ немало конкретна критика за нејзиното работење, туку дека едноставно и неосновано била бележана дека функцијата не ја извршува законски. Тој додаде и дека Русковска работи повеќе од две децении без ниту една забелешка од надлежните органи, како Советот на јавни обвинители.
Според ВМРО-ДПМНЕ, кои тврдат дека спотовите претставуваат критика, ако Русковска тврди дека се клевета, ќе мора тоа и да го докаже. Според нивниот адвокат, пак, тужбеното барање на обвинителката е неосновано:
„Морам да потенцирам две работи кои што се битни за нас. Првата работа поради која што цениме дека тужбеното барање во целост е неосновано, е заштитата на членот 10 од Европската Конвенција за човекови права, слободи и права, односно потребата од почитување на правото за слободно изразување на мислата. Особено на критичката мисла која што е насочена кон работењето на државните органи и на власта во Република Македонија. Се поставува прашање: Што е побитно? Дали јавниот интерес, дали потребата граѓаните да бидат информирани, потребата на граѓаните на Република Македонија да можат да постават одредени прашања во саркастични и провокативна форма?
И воедно заштитата на членот 10, или заштитата на приватната репутација на еден јавен функционер која што патем е платена од пари на граѓаните на Република Македонија, извршувајќи ја функцијата како што ја извршува обвинителката за организиран криминал“, изјави адвокатот по рочиштето.
