Кризата во енергетските пазари, заедно со постојаните геополитички напетости поврзани со војната и блокадата на Ормускиот теснец, предизвикува сериозни потреси во воздушниот сообраќај. Цената на авионското гориво драстично се зголеми и веќе дупло ја надминува онаа од пред конфликтот. Авиокомпаниите се соочуваат со значително зголемени трошоци, а тоа веќе се рефлектира на цените на билетите.
Германската авиокомпанија „Луфтханза“ најави откажување на 20.000 летови на кратки дестинации ова лето, во обид да ги намали трошоците за гориво и да заштеди приближно 40.000 тони керозин. Меѓу погодените места е и Ријека, која ќе биде опфатена со промени во летовите, со насочување преку поголемите европски аеродроми.
Најтешко страдаат авиопревозниците од Блискиот Исток и Азија. Дел од компаниите, како „Катар ервејс“, беа принудени значајно да го намалат бројот на летови. Во исто време, некои од нив веќе ги зголемија тарифите за гориво, меѓу кои се и „Ер Индија“, „Емирати“, „Луфтханза“ и „КЛМ“.
Според анализаторите, порастот на цените на керозинот значително ги зголемува оперативните трошоци на авио-компаниите, а уделот на горивото во цената на билетот се зголемува од околу 30% до дури 45%. Стручњаците предупредуваат дека дел од компаниите користат хеџинг за заштита од неповолни флуктуации, но пазарната нестабилност и понатаму создава неизвесност.
Поради ова, се очекува дополнителен пораст на цените на авио-билетите, со потенцијална зголемување и до 30%. Аналитичарите истакнуваат дека откажувањето на летови често се користи како финансиска стратегија за избегнување на дополнителни трошоци, особено бидејќи правилата на Европската унија дозволуваат избегнување обештетување ако откажувањето се направи навреме.
Во вакви услови, експертите предупредуваат дека планирањето на патувања на долг рок станува сè потешко, бидејќи пазарот на гориво и авионскиот сообраќај остануваат силно под влијание на геополитичките настани.
