Министерството за внатрешни работи ги информира граѓаните дека во рамките на проектот „Безбеден град“, ќе се спроведува тестирање, калибрација и верификација на сообраќајните камери од 20 до 31 јануари. Според соопштението на МВР, овие активности ќе се реализираат секој ден од 08:00 до 20:00 часот. За време на тестирањето, возилата на локациите каде што се изведуваат постапките, нема да бидат пропуштани додека трае техничката проверка и калибрацијата на опремата.
Во првата недела од предвидениот период, тестирањето ќе се фокусира само на локациите со инсталирани камери во Скопје, а потоа ќе продолжи на и на други места, во согласност со динамиката на проектот. Министерството упатува апел до граѓаните и сите учесници во сообраќајот за почитување на привремените ограничувања и упатствата на терен, како и за разбирање и трпеливост, за да се овозможи безбедно и непречено спроведување на активностите.
Проектот „Безбеден град“ цели да ја подобри сообраќајната безбедност и да ја зголеми безбедноста на сите учесници во сообраќајот преку современ систем за автоматски надзор и контрола.
