Сливите може да ги прогласиме за заштитен знак на готвењето на нашите баби затоа што нивниот мирис повеќето го паметиме од детството. Од нив може да зготвите компот, џем, но и вкусни десерти.Еве еден од нив:
Состојки: 4 јајца, 180мл јогурт, 2 чаши брашно, 100мл зејтин, 100г шеќер, 50г растопена чоколада за готвење, половина кесичка прашок за пециво, 400г исчистени модри сливи, 1 кесичка ванилин шеќер, 50г листови бадеми, 2 лажици џем
Подготовка: Со миксер сматете ги јајцата и шеќерот, додајте ги јогуртот, брашното, прашокот за пециво и зејтинот. Смесата преполовете ја и во едната половина измешајте ја растопената чоколада. Во подмачкан плех прво сипете ја смесата со чоколадото, па жолтата смеса. Преку нив распоредете парчиња сливи и печете 40 минути на 200 степени. Испечениот колач премачкајте го со џем измешан со ванилин шеќер и наредете ги листовите бадеми. Пред служење, исечете го на коцки.
Добар апетит!
