Поранешниот англиски фудбалски репрезентативец, Адам Лалана, денес официјално објави дека ја завршил кариерата на 37-годишна возраст.
Во своето соопштение, Лалана изрази голема гордост и благодарност, особено кон својот матичен клуб. „Саутемптон… местото каде што сè започна и, соодветно, местото каде што сè завршува. Тоа е клубот на кој му должам сè“, изјави тој.
Лалана минатата сезона се врати во Саутемптон откако настапуваше за Брајтон, а кариерата ја започна токму во Саутемптон, каде што играше од 2006 до 2014 година.
Во 2014 година, тој направи преселба во Ливерпул, со кој ги освои Премиер лигата и Лигата на шампиони.
„Горд сум на својата кариера и немам никакви сожалувања. Ги прифатив сите успеси и неуспеси, бидејќи тие ме обликуваа во човекот што сум. На сите оние што го направија ова патување посебно, на секој клуб и организација, тренерите, соиграчите и, секако, навивачите – ви благодарам“, изјави Лалана.
