Владата на Либан планира да го презентира својот план за разоружување на Хезболах на 21 август, објави специјалниот пратеник на САД за Сирија и Либан, Томас Барак.
Тој истакна дека Израел ќе изнесе свој контрапредлог откако ќе го разгледа планот на Либан.
Според Барак, предложениот план не предвидува употреба на воена сила.
— Либанската армија и Владата не се занимаваат со војна, туку со начини да го убедат Хезболах да се разоружа, рече Барак.
Договорот за прекин на огнот, кој беше постигнат на 27 ноември минатата година со посредство на САД, предвидува разоружување на Хезболах и отстранување на воената инфраструктура южно од реката Литани, на приближно 30 километри од израелската граница. Израел, пак, треба да ги повлече своите сили од либанската територија, но ќе задржи пет гранични пунктови кои ги смета за стратешки важни.
