Во рамки на меѓународната ликовна колонија „Дрен 2024“ во Прилеп, српскиот сликар Среќко Здравковиќ одбележа 50 години уметничко творештво. По тој повод, во Ликовната галерија на НУЦК „Марко Цепенков“ беше поставена негова самостојна изложба на слики и цртежи. Уметникот беше и учесник на ликовната колонија „Дрен 2024“.
Среќко Здравковиќ е дипломиран сликар и професор. Роден е на 15 мај 1957 година во Доњи Душник, во подножјето на Сува Планина. Основно училиште завршил во Параќин, гимназија во Чуприја, Виша педагошка уметничка педагогија, конзервација и реставрација во Белград и Академија за ликовни уметности во Нови Сад. Член е на УЛУС од 1985 година, како и на Меѓународната асоцијација на уметници (IAA AIAP UNESCO).
Самостојно изложувал околу седумдесет пати, групно изложувал на околу 500 изложби, учествувал и на голем број ликовни колонии и ликовни собири (околу 250 учества), како и на меѓународни симпозиуми за уметност (Словачка, Полска, Унгарија, Македонија).
Покрај уметничката работа, се занимава и со графички дизајн и педагошка работа (Отворено студио – уметничко училиште „Среќко“ за подготовка на ученици и студенти за продолжување на образованието од областа на визуелните и ликовните уметности).
Графички уредувал околу 150 книги, плакати, брошури, каталози, дизајнирал 100 меморандуми – заштитни знаци. Има извајано десетина портрети во бронза, реализирани неколку мозаици на цркви и насликани околу 50 икони и насликани цркви („ал-секо“ фрески).
