Москва денеска ја отфрли можноста за запирање на офанзивата против Украина и покрај повикот на нејзиниот главен сојузник, белорускиот претседател Александар Лукашенко.
Лукашенко, во денешното обраќање до нацијата, повика на итен прекин на огнот во Украина и започнување на преговори за долгорочен мировен договор. Лукашенко нагласи дека не треба да се бараат предуслови за примирјето. Истовремено, белорускиот претседател и ја предупреди Украина против лансирањето на најавената контраофанзива, потенцирајќи дека тоа, како што рече, ќе ги направи невозможни преговорите меѓу Москва и Киев.
Кремљ, меѓутоа, ја отфрли „понудата“ на Лукашенко, со одговор дека со прекин на огнот не би се постигнале целите на „специјалната воена операција“.
„На темата Украина ништо не се менува: специјалната воена операција продолжува, бидејќи тоа е единственото средство за постигнување на целите со кои се соочува нашата земја денес“, изјави портпаролот на Кремљ, Дмитриј Песков, најавувајќи дека рускиот претседател Владимир Путин следната недела ќе разговара со Лукашенко за примирјето предложено од белорускиот претседател.
„Русија не може да ја игнорира хипотетичката опасност што ѝ ја претставуваат повиците за распоредување нуклеарно оружје во Украина. Ова е многу опасен тренд“, рече Песков, коментирајќи ја петицијата објавена на веб-страницата на украинскиот претседател Володимир Зеленски.
Тој додаде и дека некои елементи од мировниот план предложен од Кина не се остварливи бидејќи, како што тврди Москва, Украина следи наредби од Западот да не преговара со Москва.
Песков ја коментираше и идејата за испраќање мировни трупи во Украина. Самата дискусија за такво нешто тој ја оцени како потенцијално „многу опасна“. Претходно, унгарскиот премиер Виктор Орбан спомена за слични дискусии во ЕУ.
