Иако Македонија традиционално се смета за земјоделска држава, загрижувачки е фактот дека повеќе од 70% од земјоделските производи што се продаваат на македонските пазари се увезени. Оваа ситуација го прави земјоделскиот сектор сè понестабилен,а земјата економски зависна од увозот. Земјоделците алармираат дека домашното производство е во сериозна криза, додека владините мерки досега не донеле значителни подобрувања.
Во Скопје,граѓаните се соочуваат со високи цени на основните земјоделски производи,а потрошувачите се жалат дека квалитетот на увезеното овошје и зеленчук не е на потребното ниво. Според домашните производители, главните проблеми лежат во недостигот на соодветни субвенции, скапи репроматеријали и неконкурентноста со увезените производи кои честопати се продаваат под реалните пазарни цени.
Во меѓувреме, Владата најавува мерки за поддршка на земјоделците, вклучувајќи зголемени субвенции и иницијативи за поттикнување на домашното производство. Сепак, земјоделците бараат итно спроведување на овие најавени политики, бидејќи многумина веќе размислуваат за напуштање на оваа дејност поради зголемените трошоци.
Дополнително, во Скопје денес се одржа протест на група земјоделци кои бараат конкретни решенија од надлежните институции. Тие нагласија дека без брзи и ефикасни реформи, Македонија ќе продолжи да се соочува со растечки увоз, што долгорочно може да ја загрози прехранбената безбедност на населението.
