„Денот на државноста и независноста, 8-ми Септември, е денот кога се одбележува раѓањето и се слави опстојувањето на независна и суверена Република Македонија“, порачаа денеска од пратеничката група на ВМРО-ДПМНЕ и коалицијата за „Обнова на Македонија“, во честитката по повод 30-годишнината од независноста на државата.
„На овој голем ден, на 8-ми Септември 1991 година, граѓаните на Република Македонија покажаа храброст и одлучност остварувајќи ја долгогодишната идеја и аманет од нашите предци кои со генерации и генерации живееја со мислата за слободна, независна и суверена Република Македонија. 8-ми Септември е симбол и потсетник на бројни предизвици и премрежја со кои Република Македонија се соочуваше во сите овие години на независност, но и поттик мудро и сплотено да продолжиме понатаму заедно да се бориме со сите идни препреки и проблеми.
Само на тој начин, сплотени, обединети и сложни, ќе успееме да ја зачуваме, одржиме и продолжиме вековната идеја за силна, слободна, суверена и независна Македонија. Нека ни е честит 8-ми Септември, Денот на независноста! Нека ни е вечна нашата татковина Република Македонија!“, порачаа од ВМРО-ДПМНЕ.
Посебна честитка упати и претседателот на партијата – Христијан Мицкоски. Тој потенцира дека денешниот празник е круна на борбата за независна, самостојна и суверена македонска држава, денот кога се исполни идеалот на Илинденците и борците од НОБ, но и илјадниците храбри синови и ќерки кои се бореа и ги положија своите животи за своја држава.
„Токму на 8-ми Септември 1991 година, на референдумот, народот во Македонија го оствари тој сон и започна сам да ја гради својата иднина и иднината на својата татковина, како рамноправна земја со сите останати во Европа и светот. Патот беше и сѐ уште е трнлив и со многу премрежија. Идејата за просперитетна Република Македонија никогаш нема да престане, особено сега, во време на економско тонење, анационални политики на власта и негирања од надвор. Таа идеја живее кај Македонците, но и Албанците, Турците, Ромите, Србите, Бошњаците, Власите и сите останати кои ја сакаат својата Македонија како свој дом, кој го наследиле од своите предци, но кој го должат на сите идни генерации“, наведува Мицкоски во честитката.
Новите предизвици, потенцира тој, бараат сплотеност во ова, како што го нарече, време-невреме на безнадежност кое оваа власт го донела.
„Државата не се само границите и институциите, туку и народот и неговите потреби. Среќата на овој народ е заменета со бесперспективност која е резултат на криминалот и корупцијата, беззаконието и неправдата, но и поделеноста и социјалната нерамноправност кои ги создаде владејачката елита. Но борбата за подобро утре никогаш не смее да престане. Таа борба денес се води и народот ќе ја извојува победата. Одново над Македонија ќе огрее сонцето на слободата и успесите ќе ги заменат неуспесите, правото ќе ја победи неправдата, напредокот ќе ја порази апатијата, подобрата иднина ќе ја смени оваа зачмаеност“, порача Мицкоски.
