„Иако изминатите месеци тивко се зборуваше, последниве денови сè погласно се говори, од страна на експонентите на власта, дека наместо да избираат граѓаните, можен е избор на претседател во Собранието на Република Македонија. Сакам да бидеме на јасно: Ова е сценарио за суспендирање на волјата на граѓаните. Поништување и укинување на правото на граѓанинот директно, на непосредни избори, да го избира својот претседател“, обвини лидерот на опозициската ВМРО-ДПМНЕ – Христијан Мицкоски, на денешниот „вонреден“ прес пред почетокот на предизборниот молк од вечерва на полноќ.
Со ова, смета Мицкоски, изборот на претседател ќе се сведе на трговија со услуги, а тоа ќе претставува не чекор поблиску до Европска Македонија, туку голем чекор наназад.
Целта на „сценариото што го најавуваат“, според Мицкоски, „е повторно да заплашат дека можат и без народот, како што тоа го направија со измените на Уставот“.
Причината поради која се прави вакво сценарио, порача Мицкоски, „е затоа што знаат дека на фер и демократски избори ќе загубат, катастрофално ќе загубат“.
Единствениот начин, според него, да се спречи таквото сценарио, е масовна излезност на изборите и гласање „за промени“.
