Заев и Филипче „да ги баталат дневнополитичките мешетарења зашто луѓе им умираат затоа што нема слободни кревети“ – повика лидерот на ВМРО-ДПМНЕ Христијан Мицкоски.
На премиерот и министерот за здравство тој им порача да излезат „надвор од стаклената кутија која сами ја создаваат“, да го слушнат плачот на народот и да прекинат со прес-конференции, а наместо тоа да започнат да ги решаваат проблемите. Според Мицкоски, тие се одговорни за тоа што дневно од коронавирусот во Македонија умираат повеќе луѓе отколку во Втората светска војна:
„Денес во државата дневно повеќе луѓе умираат во споредба со Втората светска војна. За 4 години, колку што траела тука окупацијата, во војната се губеле 17 луѓе дневно. Денес со оваа неспособна власт бројката е 30 до 40 луѓе дневно“, пишува Мицкоски, па повикува на оставка:
„Па имате ли совест, знаете ли што ѝ правите на земјата. Дајте си оставка и не правете ништо, сигурно така повеќе луѓе ќе се спасат“, оценува лидерот на најголемата опозициска партија.
