Во случај на референдум, 74.8% од испитаниците во Албанија би гласале за обединување на Косово и Албанија. Во Косово тој процент е нешто помал – за обединување би гласале 63.9%, покажува истражувањето на косовската Фондација за отворено општество (КФОС) и Фондацијата Отворено општество за Албанија (ОСФА), пренесува „Локално“, повикувајќи се на агенцијата „Бета“.
И во двете држави, противењето на обединувањето посебно е изразено во урбаните области, а како главна причина преовладува мислењето дека двете држави функционираат подобро одделно.
Од друга страна, испитаниците наведуваат разни причини за обединувањето, а кај оние во Албанија кои сметаат дека тоа е можно, преовладува мислењето дека за неговото спроведување клучен фактор е меѓународната заедница. На Косово, пак, сметаат дека таквото сценарио би можеле да го спроведат само лидерите на двете држави.
Во истражувањето, кое се однесува на поголем број прашања од интерес за двете држави, но со главен фокус на можноста за обединување, се покажува и дека по изградбата на автопатот Приштина-Драч значително се зголемени меѓусебните посети од граѓаните од двете држави, со тоа што граѓаните од Косово повеќе ја посетуваат Албанија отколку обратно.
