Министерството за одбрана на Русија денеска повторно и остро негираше каква било вмешаност во експлозијата во Полска во која загинаа две лица. Напротив, Москва е категорична дека се работи за украински проектил.
„Фотографиите од остатоците пронајдени во градот Пржеводов, кои циркулираа синоќа во Полска, беа недвосмислено идентификувани од руските воени специјалисти како елементи на противвоздушната наведувана ракета С-300 на украинската армија“, соопшти руското Министерство за одбрана, пренесува ТАСС.
Од друга страна, руското МО посочи дека вчерашните руски ракетни напади врз Украина биле насочени кон цели лоцирани на најмалку 35 километри од полската граница.
„Сакаме да нагласиме дека ракетните напади беа извршени само на територијата на Украина и на оддалеченост не поблиску од 35 километри од полско-украинската граница“, изјави портпаролот на Министерството за одбрана, генерал-полковник Игор Конашенков.
„Изјавите на различни украински извори и странски претставници за наводни ‘руски проектили’ кои паднале во населбата Пржеводов се намерна провокација со цел ескалација на ситуацијата“, додаде тој.
Инаку, дека се работи за противвоздушна украинска ракета C-300 на социјалните мрежи се шпекулираше уште вчера (сликата доле десно е од остаток од проектилот во Пржеводов, останатите се за споредба), меѓутоа Твитер корисниците меѓусебно се обвинуваа дека тоа е руска пропаганда.
Przewodów, Hrubieszow
These are 100% Ukrainian casings of the S300 missiles, with which the Ukrainians tried to knock down the Kalibr missiles
The S300 has a range of up to 200 kmRussia is 1,000 km away and could not use these missiles. pic.twitter.com/YOrei3k9Ib
— Piotr Panasiuk (@PanasukPetr) November 15, 2022
Во однос на нападите врз Украина во текот на вчерашниот ден (15 ноември), Конашенков информираше дека „руските вооружени сили извршиле масивни воздушни и морски напади со прецизно оружје со долг дострел против воениот контролен систем на Украина и соодветните енергетски објекти“. Цели во Киев, додаде тој, не биле гаѓани.
