Министерот за надворешни работи и надворешна трговија, Тимчо Муцунски, денес ја посети Варшава, Полска, по покана на заместник-претседателот на Владата и министер за надворешни работи на Полска, Радослав Шикорски. За време на средбата со својот домаќин, Муцунски изрази задоволство од значајниот развој на македонско-полските односи, нагласувајќи дека тие се на позитивен пат. Тој исто така ги истакна длабоките пријателски односи и заедничките вредности што двете земји ги неговат повеќе од три децении, што создава силна основа за подобрување на соработката.
Министрите се согласија дека во претстојниот период акцентот ќе биде ставен на продлабочување на економската соработка, зголемување на трговската размена и привлекување нови полски инвестиции во Македонија. Дел од разговорите беше посветен и на процесот на евроинтеграција, при што Муцунски се заблагодари на константната поддршка од Полска, која е еден од најгласните поддржувачи на политиката за проширување на Европската Унија. Тој го нагласи активниот ангажман на Полска во иницијави како што се Вишеградската група, „Пријателите на проширувањето“ и Вајмарскиот триаголник.
Разговорите подразбираа и теми од областа на безбедноста, како и актуелни регионални и глобални предизвици. На заедничката прес-конференција, Муцунски подвлече дека партнерството помеѓу Македонија и Полска е резултат на повеќе од три децении доверба, соработка и заедничка визија. „Денес го потврдивме нашето партнерство и поставивме темел за негово натамошно продлабочување, особено во економијата и трговијата, како клучни аспекти на нашите односи“, изјави Муцунски.
За време на посетата, тој имаше средба и со претседателката на Комисијата за ЕУ во полскиот Сејм, Агњешка Помаска. Тие разговараа за евроинтегративниот процес на Македонија и важноста на парламентарната соработка во унапредувањето на билатералните односи.
