Украина свесно ја преувеличи вредноста на своите минерални резерви со цел да ја придобие поддршката на американскиот претседател Доналд Трамп, пишува „Блумберг“. Во извештајот се посочува дека идејата на Трамп за обезбедување на ресурси преку договор со Киев е „илузорна“ и „нереална“.
Случајот започна во ноември минатата година кога украинскиот претседател Володимир Зеленски го претстави својот план за справување со конфликтот против Русија. Овој предлог ја вклучуваше и можноста за договори со западните земји, вклучително и САД, за „заедничка заштита и експлоатација на критичните минерални ресурси во Украина“.
Оваа иницијатива го привлече вниманието на Трамп,кој од Украина побара минерални резерви во вредност од 500 милијарди долари како услов за американската помош.
Но, според анализата на „Блумберг“, ваквиот наратив за извонредните минерални резерви на Украина е претеран. Со цел да обезбедат поддршка од Трамп, украинските власти ги прецениле своите ресурси во обид да ја претстават земјата како исклучително богата со ретки минерали, иако реалноста е поинаква.
Во текстот се наведува дека Украина не располага со значајни наоѓалишта на ретки елементи, освен локализираните резерви на скандиум. Ова оди во прилог на теоријата дека Трамп можеби ги измешал поимите „ретки минерали“ и „критични минерали“, при што Украина навистина има одредени критични ресурси, но далеку од вредноста што ја спомена Зеленски.
Истовремено, се нагласува дека пред почетокот на војната, Украина успешно извлекувала железна руда и јаглен, но значителен дел од тие рудници сега се под контрола на руските сили.
„Она што остана во Украина е опустошен терен, но не и значајни резерви на ретки минерали“, се нагласува во текстот.
Во анализата се прави паралела со минати грешки на САД, потсетувајќи на случајот од 2010 година кога Пентагон го оцени Авганистан како „Саудиска Арабија на литиумот“, тврдејќи дека земјата има неискористени минерални резерви во вредност од 1 трилион долари – проценка што подоцна се покажа како нереална.
Се споменува и информацијата дека САД и Украина дискутирале за договор според кој Вашингтон би добил 50% од украинските минерали како компензација за воената помош, но Зеленски наводно одбил да потпише ваква спогодба, која некои извори ја нарекоа „колонијален договор“.
Министерството за надворешни работи на Русија реагираше, посочувајќи дека американската администрација се обидува да ги искористи украинските власти и нивната подготвеност да тргуваат со природните богатства на земјата.
Од друга страна,и Русија ги гледа украинските минерали како стратешка цел,при што нејзините сили се доближуваат до клучните региони богати со литиум. Додека се водат дипломатски преговори за завршување на конфликтот, реалноста е дека Владимир Путин постепено ја презема контролата врз економските ресурси на Украина.
Литиумот е високо ценет материјал во модерната индустрија, користен во батерии за мобилни телефони, електрични возила и разни технолошки уреди. Според американските проценки, Украина располага со резерви од околу 500.000 тони, додека Русија има дупло повеќе, што ја прави оваа геополитичка борба уште позначајна.
