Израелскиот премиер Бенјамин Нетанјаху отпатува за Вашингтон на кратка посета, во време на интензивни напори за постигнување договор за прекин на огнот во Газа и ослободување на заложниците.
„Ова е мојата трета средба со претседателот Доналд Трамп откако тој беше избран пред шест месеци“, изјави Нетанјаху на аеродромот Бен Гурион.
Трамп претходно изрази надеж дека договорот со Хамас ќе биде постигнат „оваа недела“. Израелскиот премиер потврдил дека испратил преговарачка делегација во Доха, каде што посредуваат Катар, Египет и Соединетите Држави.
Предлогот предвидува 60-дневен прекин на огнот, во текот на кој треба да бидат ослободени 10 од 20-те израелски заложници, додека двете страни преговараат за траен крај на конфликтот. Хамас го прифати договорот во принцип, но побара одредени измени, што Израел ги отфрли.
Нетанјаху истакна дека има три главни цели: ослободување на сите заложници, елиминација на Хамас и обезбедување дека Газа повеќе нема да претставува закана.
Неговата посета на Вашингтон доаѓа помалку од две недели по 12-дневната војна со Иран, во која, според Техеран, загинаа повеќе од 900 лица. Нетанјаху оцени дека тие напади „создадоа услови за поширок регионален мир“.
