„Ни треба опозиција што ќе се надмине себе си, опозиција што ќе зборува за тоа на кој начин побрзо ќе се одвиваат процесите кон ЕУ. Во моментов, треба да разговараме како да изгледаат преговарачките тимови и како да функционира Собранието“, изјави премиерот Димитар Ковачевски во интервју на ТВ „Канал 5“.
Тој смета дека блокадите не треба да продолжат, особено што од септември, како што рече, нѐ чека последниот дел од годината кој ќе биде исклучително тежок од аспект на економската криза.
Според Ковачевски, предвремени избори нема да има, ниту ќе има референдум.
„Пред нас е нов чекор во развојот на државата. Веќе имаме почнато процес на преговори и од тој процес нема назад“, рече тој. „Треба што побрзо да го комплетираме скринингот и да ги завршиме обврските од вклучувањето на делови на народи кои живеат во земјава“, додаде премиерот.
Тој смета дека „има време опозицијата да се убеди во исправноста на сегашните чекори на државата“.
„Верувам дека со текот на времето и сѐ поголем број граѓани, особено оние кои веруваат во европската идеја и во просперитетна држава, ќе се приклучат кон процесот на ЕУ. Единаесет години оваа земја беше држена во заложништво, 11 години некој креираше само споменици во центарот на Скопје, се обидуваше да нѐ раскара со соседите и внатре, а гледавме и тензии на етничка основа. Тоа денес го нема“, тврди Ковачевски.
„Верувам во капацитетот на нашиот народ, верувам дека имавме најбрзо интегрирање во НАТО. Сметам дека ќе имаме и најбрзо интегрирање во ЕУ“, истакна Ковачески во интервјуто.
Во однос на преговорите со ЕУ, тој повтори дека е рационален оптимист.
„Рационален оптимист сум во однос на преговорите, а тоа значи дека верувам во остварување на целта, работам на тоа и целта ќе се оствари. Ова е неповратен процес што оди напред, што ја носи државата напред, процес од кој нема назад, нема ни лево, ни десно. Од сите нас зависи колку брзо ќе одиме напред и колку брзо ќе станеме членка на ЕУ“, рече премиерот.
Извор: МИА
