Ново лого на Јавното обвинителство
Логото е дизајнирано врз основа на прецизна геометриска структура, која обезбедува визуелна рамнотежа, стабилност и ненадминлива препознатливост во сите формати и апликации. Боите што се користат – темно сина и златна – носат силни симболи. Темно синото ја отсликува довербата, професионалноста и стабилноста на институцијата, додека златната боја укажува на достоинство, авторитет и основните вредности на правдата.
„Создавањето на новото лого не беше само воведување на нов графички симбол. Нашата цел беше да ја претставиме целокупната обвинителска организација во еден единствен визуелен знак, заедно со нејзината структура, поврзаност и заедничка мисија во заштитата на законитоста и јавниот интерес. Мечот, поставен во центарот, симболизира Јавното обвинителство на Република Северна Македонија како клучен столб на обвинителската организација и гарант за нејзиното единствено и координирано функционирање. Поставен е исправено и насочен нагоре, што ја искажува будноста, одлучноста и постојаната подготвеност за заштита на законитоста и владеењето на правото“, изјави јавниот обвинител Ненад Савески.
Од двете страни на мечот се наоѓаат тасовите од вагата – универзален симбол на правдата, непристрасноста и еднаквата примена на законот. Тие ја отсликуваат заедничката цел на севкупната обвинителска организација.
Врвките кои ги држат тасовите на вагата симболично ги претставуваат повисоките јавни обвинителства, кои се важна алка во поврзувањето на различните нивоа на обвинителскиот систем, придонесувајќи за неговата стабилност и функционалност.
Околу нив се распоредени 23 ѕвезди, кои ја симболизираат мрежата на основните јавни обвинителства низ целата држава. Тие се темелот на системот и местото каде што граѓаните најчесто се среќаваат со работата на обвинителството.
Во централна позиција е поставена ѕвездата, која симболизира Основното јавно обвинителство за гонење на организиран криминал и корупција. Невозможно е да не се забележи нејзината важност; големината е идентична со останатите ѕвезди, но нејзината централна поставеност ја нагласува специфичната надлежност на ова обвинителство, кое се протега на целата територија на државата.
На овој начин, сите нивоа на обвинителската организација се обединети во еден единствен знак, кој во целост наликува на европските симболи и ја одразува аспирацијата на институцијата да ги достигне европските стандарди на владеење на правото.
