Министерката за енергетика, рударство и минерални суровини, Сања Божиновска, денеска во Истанбул ќе ги презентира енергетските и инвестициските можности на Македонија пред турската бизнис-заедница. Оваа презентација се одвива во рамките на Бизнис форумот Северна Македонија – Турција, кој е насочен кон продлабочување на економската соработка помеѓу двете земји.
На форумот ќе присуствува и високопрофилна македонска владина делегација, предводена од премиерот Христијан Мицкоски, во чиј состав ќе бидат министри од економските, енергетските и инфраструктурните ресори. На настанот, домаќин од турска страна ќе биде министерот за трговија, проф. д-р Омер Болат, а организацијата ја координатат турското Министерство за трговија и Советот за надворешни економски односи.
Овој настан е наменет за собирање на претставници од владите, институциите и бизнис-заедниците на двете држави, со цел да се интензивира трговската размена, да се поддржат нови инвестициски иницијативи и да се создадат нови партнерства. Во рамките на форумот, Божиновска ќе учествува на панел-дискусијата „Билатерална соработка во трговијата, индустријата, производството и синџирите на снабдување“, каде ќе презентира производствени можности во секторите енергетика, рударство и минерални суровини, како и реформите за создавање стабилна и предвидлива инвестициска клима.
На маргините на форумот, министерката ќе оствари билатерална средба со турскиот министер за трговија Омер Болат, на која ќе се разговара за унапредување на економската соработка, зголемување на турските инвестиции во Македонија, како и можностите за заеднички проекти во енергетиката, рударството и развојот на стратешките индустрии. Овој бизнис форум се смета за важна платформа за поврзување на институциите и деловната заедница на Македонија и Турција, со настојување за отворање нови перспективи за инвестиции и поттикнување на одржлив економски развој.
