Граѓаните на западните земји веќе плаќаат висока цена за антируските санкции што ги воведоа нивните држави, но цената ќе продолжи да расте секој ден, изјави денеска портпаролот на Кремљ – Дмитриј Песков, потенцирајќи дека Русија подготвува одговор на шестиот пакет санкции на ЕУ.
„Разгледуваме различни опции. Ако зборуваме за областа на санкциите воопшто, ова е меч со две острици. Американците, Европејците и другите земји се обидуваат да ни наштетат и треба да платат висока цена“, истакна Песков.
Денеска Европската комисија предложи шести сет санкции за Русија, вклучително и целосна забрана за увоз на руска нафта до крајот на годинава. Сепак, засега, ЕУ членките не успеваат да се договорат за ембаргото.
