Ситуацијата со пожарите во Албанија продолжува да се влошува. Денеска, полицијата од Елбасан соопшти за првата жртва, 80-годишен маж кој го изгубил животот во пожар во селото Кулолас, предизвикан од него самиот.
„Денеска, околу 11 часот, мажот иницирал пожар во својот двор. Овој пожар брзо излезе од контрола и се прошири во неколку села во округот Грамш. Тој загинал од задушување“, се вели во соопштението за медиумите.
Во одговор на ситуацијата, полицијата, противпожарната служба и тимовите за итни случаи веднаш реагираа на терен, активирајќи интензивни напори за гаснење на пожарот и евакуација на жителите од загрозените села.
Поради брзото ширење на пожарите, Министерството за одбрана наложи евакуација на жителите од три села во подрачјето на Грамш.
„Ги повикуваме жителите на Кулолас, Блетез и Менколаре веднаш да ги напуштат своите домови и да соработуваат со властите за безбедна евакуација“, се вели во соопштението на министерството.
Во оваа област, покрај противпожарната единица и локалната власт, вклучени се и 80 војници, како и воен хеликоптер, кои работат непрекинато за да ги ограничат пожарите.
