Фудбалерите на француски Монако направија изненадување совладувајќи ја Барселона со 2:1 во првото коло од новиот формат на Лигата на шампионите.
Почна лошо за Барселона. Гостите веќе во 10. минута останаа со играч помалку. Голманот Марк-Андре тер Штеген направи погрешно додавање, Минамино ја „украде“ топката, а Ерик Гарсија како последен играч во одбраната го собори и заработи исклучување. Само шест минути подоцна Магнес Аклиуш по соло пробив погоди за 1:0. Барселона успеа да израмни во 28. минута преку Ламине Јамал.
Тимот од Кнежевството до нова предност стигна во 72. минута. Вандерсон испрати одлична, долга топка до Георг Иленихена кој сам се проби пред голманот на Барса и прекрасно погоди за 2:1. Иленихена во 80. минута можеше да ја потврди победата на домашните, но шутираше слабо. Две минути подоцна одлична шанса имаше и Фоларин Балогун, но Тер Штеген одбрани. Во 86. минута холандскиот судија Алард Линдхаут досуди пенал за Монако по стартот на Мартинез над Балогун, но ја смени одлуката по асистенцијата на ВАР. До крајот на мечот Каталонците се обидоа да извојуваат реми, но не успеаја.
Одличната вечер на француските клубови ја заокружи Брест кој во првиот европски настап го победи Штурм со 2:1. Брест се натпреварува во европско натпреварување првпат во својата 121-годишна историја, откако минатата сезона заврши на третото место во француската Лига 1. Францускиот тим поведе во 23. минута со голот на Иго Мањети, но гостите израмнија во самиот финиш на полувремето по автоголот на Едмилсон Фернандес. Победата за Брест кој играше во Генган ја донесе Абдала Сима погодувајќи за 2:1 во 56. минута. Од 88. гостите играа со играч помалку откако беше исклучен Димитри Лавале. За Штурм од 60. минута играше Ловро Звонарек.
Атлетико Мадрид со истиот резултат го победи РБ Лајпциг. Гостите поведоа во 4. минута со голот на Бенјамин Шешко. Тоа беше брза контра на германскиот тим. Лоис Опенда шутираше, Јан Облак одбрани но неговиот соиграч од словенечката репрезентација Шешко со глава ја ја смести во мрежата одбиената топка. Атлетико успеа да израмни во 28. минута со прекрасниот гол на Антоан Гризман. По постигнувањето на голот, францускиот напаѓач му асистираше на Хозе Хименез во 89. минута, кој го натскока својот чувар и со глава ја однесе победата за шпанскиот тим.
Аталанта и Арсенал одиграа без голови, а херој на натпреварот беше голманот на гостите Давид Реја, кој во 50. минута му одбрани пенал на Матео Ретеги, а потоа го „симна“ ударот со глава на домашниот напаѓач.
Во претходниот натпревар, германскиот фудбалски шампион Баер Леверкузен ја отвори Лигата на шампионите со убедлива победа од 4:0 во Ротердам против Феенорд. На „Де Куип“ стадионот сѐ беше готово по првото полувреме во кое гостите ги постигнаа сите четири гола. „Аптекарите“ поведоа уште во петтата минута. Рамиз Зеруки ја загуби топката, а тоа го искористи Роберт Андрич ангажирајќи го Флоријан Вирц, кој шутираше од работ на шеснаесетникот и погоди.
Со 21 година и 139 дена, Вирц стана вториот најмлад играч на Баер кој постигнал гол на своето деби во Лигата на шампионите. Рекордот сѐ уште го држи хрватскиот фудбалер Марко Бабиќ, кој постигна гол против Јувентус во 2002 година со 21 година и 43 дена.
Во 30. минута меѓу стрелците се запиша и Алекс Грималдо, овојпат на асистенција на Џереми Фримпонг. Шест минути подоцна Вирц повторно ја затресе мрежата на домаќините, а во 44. минута фантастичната половина на германскиот тим ја заокружи Тапсоб, чиј удар во сопствената мрежа го одврати голманот Тимон Веленројтер.
Победа на гости оствари и Бенфика која во Белград ја совлада Црвена ѕвезда со 2:1. Португалскиот гигант поведе во деветтата минута со голот на Керем Актуркоглу. Тоа беше брза акција на гостите. Анхел ди Марија на крилните позиции го вработи Александар Бах, кој на подалечната статива му префрли на Актуркоглу, кој немаше потешкотии да постигне гол. Гостите дојдоа на чекор до победата во 29. минута кога Оркун Кокча постигна одличен гол од слободен удар. Домашните ја имаа иницијативата во вториот дел а ја искомплицираа ситуацијата во самата завршница намалувајќи го резултатот со голот на Фелисио Милсон во 86. минута. Бенфика можеше да постигне и трет гол во судиското надополнување, но Зеки Амдуни ја погоди стативата.
