Руското Министерство за надворешни работи во средата ги предупреди своите граѓани да се воздржат од патувања во земји кои имаат договори за екстрадиција со САД. Во препораката се нагласува дека кривичниот прогон од страна на Вашингтон е интензивиран откако започна војната во Украина во 2022 година, и дека луѓето можат да се соочат со долги затворски казни ако бидат екстрадирани во САД.
Министерството потсети дека многу Руси, не знаејќи, можат да станат мета на американските правосудни и разузнавачки служби поради бројните екстериторијални санкции. Исто така, се истакнува дека американските агенции често користат превртливи методи, привлегувајќи руски државјани преку разни бизнис или туристички понуди во странство. Некогаш, таквите лица веднаш се апсат по пристигнувањето во трета земја.
Предупредувањето е упатено на Руси кои веруваат дека би можеле да бидат предмет на кривичен прогон од страна на американските власти или се на списокот на санкции. Како ризични земји се наведе Велика Британија, Швајцарија, повеќето членки на Европската Унија, Канада, Австралија, Израел, а делумно и Латинска Америка, Либерија, Мароко и неколку азиски земји.
Русија истакнува дека од 2008 година, кога во Тајланд беше уапсен познатиот трговец со оружје Виктор Бут, повеќе од 100 руски државјани биле екстрадирани во САД. Бут во САД помина 14 години во затвор поради трговија со оружје, перење пари и завера за убиство на американски државјани. Ослободувањето на Бут во 2022 година се случи во размена за американската кошаркарка Бритни Грајнер, која беше затворена во Русија поради привнесување масло од канабис за електронски цигари.
