На итната седница на Собранието на кантонот Сараево, кое Американската амбасада пред неколку дена го прогласи за град со најголемо загадување на воздухот во светот, надлежните дискутираа и за тоа колку се релевантни податоците од мерниот инструмент на амбасадата и дали тоа е доволна основа Сараево да биде прогласен за најзагадениот град во светот.
Според министерот за просторно уредување, градење и заштита на околината на Сараевскиот кантон – Чедомир Лукиќ, во фамата по соопштението на амбасадата, која ја мери загаденоста на воздухот во Сараево, голем удел имале и медиумите. Лукиќ оцени и дека малите ложишта се најголеми загадувачи, па потребно е да се направи нова анализа која ќе го покаже реалниот процент на уделот на сообраќајот во квалитетот на воздухот.
На седницата се обрати и членот на стручното тело за спроведување на планот за интервентни мерки во кантонот Сараево – Пламенко Тајс, кој во однос на податоците за загаденост на воздухот објавени од американската амбасада искоментира:
„Дали сме најзагадени – не сме. Дали се загадени – сме. Местото на поставување на анализаторот на американската амбасада е многу спорно, поради еден значаен извор на загадување кој се наоѓа во близината – ќебапчилница. Таа многу често емитува сериозно многу (загадување) кон американската амбасада. Самата локација и начинот на прикажување на резултатите на американската амбасада не се во склад со нашите стандарди“, истакна Тајс.
Еден од оние кои ја искоментираа констатацијата на Тајс, и тоа доста иронично, беше и Звонко Мариќ – застапник на Сојузот за подобра иднина:
„Не сум задоволен од одговорот кога е во пршање седницата и смислата на одржување на оваа седница. Но во однос на овој вториов истап на господинот Тајс, се надевам дека сфатија во американската амбасада, како што и ние овде сфативме, дека причината е кебапчилницата. Не знам која е смислата да расправаме и понатаму кога ете најпосле ја откривме причината за загаденоста на воздухот“.
