Воспоставување на ред, правда и дисциплина во државата, но и силна, неселективна борба против криминалот и корупцијата на сите нивоа, ќе бидат еден од главните приоритети на новата Влада во следниот четиригодишен мандат, порачуваат од СДСМ.
„Задача на новата влада е да обезбеди ред и дисциплина во сите институции и да расчисти со криминалот и корупцијата на сите нивоа, без разлика дали некој доаѓа од партија, од општина, од институција, дали е експерт, функционер.
Ќе има проверка на потеклото на парите и на капиталот кај секој функционер, како и санкции за оние кај кои е утврдено нечесно работење.
Следува процес на прочистување на судството. Оние судии за кои ќе се докаже дека свесно застарувале предмети ќе бидат разрешени, а следува и ревизија на 5 отсто од судски предмети одбрани по случаен избор.
Предметите од Специјалното јавно обвинителство кои со години се заглавени, ќе добијат конечна разрешница“, се вели во соопштението.
Од партијата велат дека поддршката и довербата добиена на предвремените парламентарни избори значи и целосна поддршка во борбата против корупцијата, која, како што велат, е заеднички непријател и на граѓаните, и на институциите.
„Ред дицсиплина и правда е еден од нашите столбови на којшто се обврзавме и тоа ќе го испорачаме во следниот период. Во новиот, четиригодишен мандат ќе покажеме дека можеме уште повеќе и уште подобро да работиме во интерес на граѓаните и државата“, порачуваат од СДСМ.
