„СДСМ најостро ги осудува вчерашните протести, пораките, говорот на омраза, навредите кон докторите, медицинскиот персонал, но и новинарите и адвокатите“, порачаа денеска од владејачката партија.
Тие посочуваат дека докторите и медицинскиот персонал кои неуморно се во првите линии во одбрана од корона вирусот се нашите херои кои заслужуваат длабока почит и благодарност, а медиумите и новинарите имаат клучна улога во навремено информирање на граѓаните и недозволиво е да се напаѓаат.
„Не само пораките од овој срамен настан, самиот протест претставува загрозување на здравјето на граѓаните. Протестот е уставно загарантирано право, но исто такво е и правото на здравје. Здравјето на човекот е над сѐ!“, порачуваат од СДСМ.
Според нив, на протестите имало доволно показатели дека зад нив стои опозицијата. Како доказ тие приложија неколку фотографии и принтскринови за поврзаноста на организаторите/учесниците на протестите – со високи функционери од ВМРО-ДПМНЕ, вклучително и лидерот Христијан Мицкоски.
„Организацијата на протестите во повеќе градови, иконографијата идентична со опозициските митинзи, политичките пораки против актуелни министри, како и евидентно присутните членови и симпатизери на две политички партии, покажуваат дека зад овие протести стојат ВМРО-ДПМНЕ и Левица. Секако, поддржани од ‘Бојкотирам’.
Токму ВМРО-ДПМНЕ и Левица, беа против новите мерки за заштита на здравјето и за цело време од пандемијата делуваат спротивно на препораките, поттикнувајќи непочитување на мерките. Со овој начин на делување ВМРО-ДПМНЕ и Левица се сериозна опасност по здравјето на граѓаните“, изјави на денешната прес-конференција пратеникот на СДСМ – Ненад Коциќ.
„Лажните информации со кои некој упорно сака да ве одврати од вакцинацијата се на ваша директна штета, на штета на вашето здравје и на штета на здравјето на оние околу вас“, им порача Коциќ на граѓаните.
„Масовната вакцинација е единствен начин за да се заштитите, да го заштитите вашето но и јавното здравје.
Ги повикуваме сите граѓани кои досега не се вакцинирале да го сторат тоа што поскоро. Вакцини има доволно. Фактот што дури 90% од новозаразените последната недела се невакцинирани и исто толкав процент од хоспитализираните, е недвосмислена потврда за ефикасноста на вакцините“, додаде Коциќ.
Од СДСМ додаваат дека исто така важно е и почитувањето на новите мерки за заштита на здравјето. Тие посочуваат дека во многу држави веќе е секојдневие да се бара ковид серитификат за влез во различни објекти или на настани. Тоа не е дискриминација, туку одговорност и заштита на јавното здравје, тврдат од партијата.
„Да бидеме одговорни кон себе и кон другите, да дадеме свој придонес во оваа борба која е заедничка за целиот свет“, порачуваат од СДСМ.
