Маркос Сенеси ќе го напушти Борнмут по завршувањето на оваа сезона, а неговиот статус на слободен агент веднаш привлече внимание од најголемите клубови во Премиер лигата.
Овој клуб од јужна Англија официјално потврди дека аргентинскиот стопер нема да го продолжи договорот, што значи дека по четири години ќе заврши неговата приказна на стадионот „Виталити“.
Сенеси пристигна во Борнмут во 2022 година од Феенорд и за време на неговиот престој, стана еден од клучните играчи во одбраната.
Во текот на четирите сезони, тој настапи на 126 натпревари во сите конкуренции и значително придонесе за стабилизација на Борнмут во Премиер лигата. Клубот најави дека навивачите ќе можат да се збогуваат со искусниот дефанзивец по последниот домашен натпревар од сезоната против Манчестер Сити.
„По четири успешни сезони на југот на Англија, можеме да потврдиме дека Маркос Сенеси ќе го напушти клубот на крајот од сезоната,“ изјавија од Борнмут.
Аргентинецот се збогува со клубот и навивачите со емотивна порака.
„Од првиот ден се чувствував како дома. Горд сум на сè што постигнавме и им сум благодарен на навивачите за нивната поддршка во текот на сите овие години. Борнмут секогаш ќе има посебно место во моето срце,“ изјави Сенеси.
Неговите извонредни игри не останаа незабележани, па медиумите во Англија известуваат дека Ливерпул, Манчестер Јунајтед, Челзи и Тотенхем сериозно се заинтересирани за него.
Foto/ Depositphotos
