Министерот за одбрана на Србија, Милош Вучевиќ, денеска оцени дека вооружувањето на Косово од членки на НАТО алијансата во последниот период не го менува балансот на силите, но „ја менува состојбата на теренот“.
„Ова се веќе далеку посериозни безбедносни предизвици и ризици за нашата земја. Апсолутно не размислуваме, но спроведуваме сѐ што би било контрамерка, за да може српските вооружени сили да одговорат на тој ризик. Контрамерки во смисла на запирање на тие летала (дронови Бајрактар TB2′), некои со одредени системи, некои со електронска неутрализација“, изјави Вучевиќ за телевизијата Б92.
Министерот оцени дека е неспорно оти поединечни членки на НАТО во последно време „многу посериозно“ го вооружуваат Косово, нагласувајќи дека тоа не го прави целата алијанса.
„Не само што ги обучуваат, едуцираат, ги усовршуваат своите офицери, подофицери и војници, туку сега вршат и посериозни испораки на оружје и воена опрема, што е апсолутно кршење на Резолуцијата 1244 на Советот за безбедност на Обединетите нации“.
Тој додаде дека Косово добило пет турски беспилотни летала, односно беспилотни летала „Барјактар ТБ2“, кои, како што рече, се оружје од офанзивен карактер, но и противоклопни и противтенковски системи „умташ“, исто така турски.
„Тоа е помоќно од ‘Џавелин’ што ги добија Украинците против Русите, на украинското боиште. Добија минофрлачи од 82 и 120 мм, сите со минофрлачка муниција, добија гранати и уште нешто што не е за потценување“.
МИА
