Употреба на било каков вид на нуклеарно оружје од страна на Русија ќе предизвика сериозни последици, предупреди и денеска генералниот секретар на НАТО – Јенс Столтенберг, без да даде детали, јави дописничката на МИА од Брисел.
Руските заплашувања со нуклеарно оружје ќе ја променат природата на војната во Украина, се согласија денеска сите земји членки на НАТО.
„Ако Русија употреби нуклеарно оружје против Украина, тоа ќе има многу сериозни последици и ова е нешто што Русија го знае – сојузниците ѝ го соопштија тоа на Русија на разни начини. И нема да навлегувам каков точно ќе биде нашиот одговор, но ќе ја промени природата на конфликтот. Тоа ќе значи дека е премината многу важна граница; дури и ако е мало нуклеарно оружје, природата на конфликтот ќе биде изменет. Русија знае дека ќе има последици“, рече Столтенберг на прес-конференција во Брисел.
Тој повеќе пати повтори дека Северноатлантската алијанса е само одбранбен сојуз и дека нејзината цел е да спречи употреба на нуклеарно оружје и да ги заштити нејзините членови. Тоа значи дека и најмал напад на земја членка ќе го активира членот пет на НАТО за колективна одбрана.
„Еден за сите, сите за еден“, потенцираше Столтенберг.
Во однос на Украина, генералниот секретар на Алијансата беше категоричен дека во оваа војна НАТО „само пружа поддршка, но не е дел од конфликтот“.
Тоа нема да ги спречи земјите членки да продолжат да ѝ помагаат на Украина економски, хуманитарно и со оружје. Шпанија на министерскиот состанок за одбрана овие два дена најавила, исто така, дека ќе испраќа дополнителна вооружена помош за да се зајакне противвоздушната одбрана на Киев во момент кога Москва ги засилува нападите врз украинските градови и таргетира цивили и критична инфраструктура.
Прашан за коментар по изјавите на францускиот претседател Емануел Макрон за потребата од евентуален дијалог со Русија и дали со ова Франција го поткопува НАТО, Столтенберг кусо одговори дека „темелната цел на НАТО е нуклеарно спречување и спречување на агресија“ и дека ризикот од напад е многу далечен.
На состанокот на министрите за одбрана се одржа дискусија за потребата да се наполнат залихите на оружје на земјите членки, кои полека се празнат поради војната во Украина, и донесена е заложба за соработка со воената индустрија за зголемување на производството на потребно оружје.
Министрите се осврнале и на ситуацијата на Западен Балкан, посебно во Босна и Херцеговина и Косово.
Во однос на Босна и Херцеговина, НАТО изрази надеж дека мисијата Алтеа во БиХ ќе добие продолжување на својот мандат од страна на Обединетите Нации.
Што се однесува до Косово, генералниот секретар укажа на заострувањето на реториката и од српска и од косовска страна и побара од сите да се воздржат. За НАТО најдобро и единствено решение за Србија и Косово е дијалогот под водство на ЕУ. Ова е кажано денеска на седница на министрите со високиот претставник за надворешна политика на ЕУ, Жозеп Борел.
Извор: МИА
