Стотици илјади мали црвени ракчиња ги преплавија плжите на југот во Калифорнија, боејќи го песочниот брег во црвена боја, објавија експертите.
Топлите морски струи ги носеле кон северот и во близина на брегот што не е вообичаедно, па илјадници загинале на плажата, додека некои морето ги повлекло кон назад – живи.
Според експерт за океанографија од Универзитетот Калифорнија во Сан Диего, Линдзи Сала, ваквите појави се веќе забележани и нема да водат кон исчезнување на видот.
„ Ова е дефинитивно показател на топлите води. Дали е директно поврзано со Ел Нињо или други океанографски услови не е сигурно“, вели Сала.
Сала предупредува дека раковите не се за јадење поради тоа што можеби конзумирале фитопланктон кој произведува токсини. Научниците откриле и досега најголемо цветање на алги во Тихиот Океан од северниот дел на Калифорнија, до државата Вашингтон, а Сала не може да каже дали раковите на брегот се поврзани со тој феномен.
Раковите се неколку сантиметри големи и личат на минијатурни јастози, а воглавно се хранат во горниот слој од океанот.
