Нова ера во Apple: Тим Кук се повлекува, Џон Тернус нов главен извршен директор
По речиси 15 години на челната позиција, Тим Кук објави дека се повлекува од позицијата главен извршен директор на Apple. Неговиот наследник ќе биде Џон Тернус, досегашниот висок потпретседател за хардверски инженеринг. Официјалното преземање на функцијата е планирано за 1 септември, а Тернус ќе биде новото лице на важните хардверски настани на компанијата.
Оваа одлука за временски рамки се смета за внимателно избрана, бидејќи се очекува дека на есенските презентации Apple ќе ги претстави новите модели на премиум iPhone – iPhone 18 Pro и iPhone 18 Pro Max, како и првиот преклоплив iPhone, што ќе биде важен момент за новиот директор.
Но акцентот не е само на „преклопливиот“ iPhone. Apple работи на најмалку девет нови категории уреди и решенија, кои би можеле да го обележат мандатот на Тернус. Некои од овие проекти се насочени кон проширување на присуството на Apple во домот и во носливата технологија, а други се долгорочен обид за создавање на следната „голема платформа“ по смартфонот.
Еве некои од најинтересните новини:
-
„Smart Home Hub“ – уред сличен на HomePod, опремен со екран, кој може да се монтира на ѕид и поддржува нов оперативен систем, Siri и FaceTime.
-
„Tabletop Robot“ – уред со девет инчен екран на роботска рака, дизајниран за видеораговори и интеракција во домот.
-
Систем за домашна безбедност – решение кое ќе ја постави Apple како конкурент во сегментот на „паметна“ заштита на домот.
-
Паметни очила – уред за кој долго време се шпекулира, со камери и функции за вештачка интелигенција.
-
AirPods со камера – иновација за слушалки со пониска резолуција на камерата, дизајнирани за интеграција со AI функции.
-
„AI привезок“ – мал нослив уред со камера и компјутерски вид за собирање податоци од околината и интеграција со iPhone AI и Siri.
-
MacBook со екран на допир – премиум модел со OLED, очекуван кон крајот на 2026 година или почетокот на 2027.
-
Лесни AR очила – уред кој прикажува дигитални информации врз реалниот свет, сметан за иднина на персоналните уреди.
-
Преклоплив iPad – проект со околу 20-инчен екран, но со непозната комерцијална судбина.
Тернус, кој долго време бил вклучен во развојот на клучни производи, сега ќе треба да ја пренесе инженерската креативност во конкретна визија за следниот циклус на раст. Доколку новите уреди навистина стигнат на пазарот, првите големи испитувања за новото раководство ќе дојдат многу брзо – на есенските премиери и со очекуваното појавување на првиот преклоплив iPhone.
