Министерството за внатрешни работи објави дека во ноќта помеѓу 25 и 26 април, од 21 до 03 часот, Мобилната единица за безбедност на сообраќајот спровела интензивна акциска контрола на територијата на општините Кисела Вода, Илинден и Ѓорче Петров.
При овие контроли, осум возачи биле санкционирани за управување под дејство на алкохол, додека две лица одбиле да се подложат на алкотестирање. Покрај тоа, тројца возачи добиле казни за други сообраќајни прекршоци. Едно лице било лишено од слобода поради кривичното дело „безобѕирно управување со моторно возило“, односно управување со возило под влијание на алкохол со над 1,50 промили.
Од МВР најавија дека по комплетирањето на документацијата за овие случаи, ќе следуваат соодветни прекршочни и кривични пријави. Акциските контроли ќе продолжат и во иднина со цел да се зголеми безбедноста во сообраќајот. Од Министерството упатуваат апел до граѓаните да ги почитуваат сообраќајните правила и прописи.
