„Резолуцијата во американскиот Сенат да се слават македонскиот јазик, култура и историја е уште една потврда за успешноста на меѓународната политика на СДСМ и признание за конструктивната улога на Македонците во градењето на американското општество.
По Резолуцијата во Германскиот Бундестаг со Резолуцијата во САД, гордост е да се знае дека македонските јазик, култура и историја добиваат признанија и промоции насекаде низ светот“, соопштија денеска од СДСМ, по веста дека во американскиот Сенат е предложена резолуција со која се бара, меѓу другото, септември 2023 година за месец на македонско-американско наследство, за време на кој ќе се слават јазикот, историјата и културата на македонските Американци.
Резолуцијата, меѓутоа, ја претстави републиканскиот сенатор од Индијана – Мајк Брон, но иницијативата е на Обединетата македонска дијаспора (ОМД). Брон, како што посочува „Гласот на Америка“, е единствен сенатор што е член на групата пријатели на Македонија и македонските Американци во Конгресот, а резолуцијата прво треба да биде одобрена од сенатскиот комитет за судство, па дури потоа за неа да гласа целиот Сенат.
Во резолуцијата, инаку, се вели дека е важно да се истакнат бројните придонеси и културно влијание на македонските Американци во САД, чија бројка се проценува на околу 500.000 граѓани, во различни области (уметност, наука, бизнис, политика, медицина, спорт итн.), и да се поттикнат граѓаните на САД да го одбележат месецот на македонско-американско наследство со соодветни церемонии, активности и програми кои ги почитуваат културните придонеси и достигнувања на македонските Американци.
Претседателот на ОМД, Мето Колоски, во интервју за ТВ „Алфа“, изјави дека ОМД верува дека признавањето на септември како месец на македонско-американското наследство ќе даде можност да се подигне свеста и благодарноста за богатата историја, култура и достигнувања на македонската американска заедница, додека за „Гласот на Америка“ истакна дека истата „е особено важна во време кога државата се соочува со негирање на македонскиот јазик и идентитет од страна на Бугарија“.
Од СДСМ, меѓутоа, резолуцијата ја гледаат како потврда дека „наспроти повеќемесечните лаги на ДПМНЕ за наводно загрозување на македонскиот јазик и идентитет, факт е дека тие како никогаш порано не се повеќе заштитени и потврдени во светот“. Од партијата велат дека СДСМ „продолжува да работи на дополнителна меѓународна афирмација на македонскиот јазик, култура и посебност и да ги остварува стратешките цели на државата“.
И ВМРО-ДПМНЕ ја поддржа резолуцијата, со тоа што партијата смета дека истата е производ на тоа што тие го актуелизирале прашањето за гаранции за македонскиот идентитет.
Одговарајќи на новинарско прашање, портпаролот на партијата, Наум Стоилковски, рече дека ВМРО-ДПМНЕ дава безрезервна поддршка на предложената резолуција за заштита на македонскиот идентитет и „ги охрабрува и другите институции и држави да донесат документи за поткрепа на многувековната македонската посебност“, како и дека „ова се случува благодарение на ВМРО-ДПМНЕ“.
„Дозволете ми да подвлечам дека пред две години никој не зборуваше за гаранции за македонската многувековна историска и културна посебност, и ова прашање и реакција се случува благодарение на ВМРО-ДПМНЕ која што го отвори и наметна прашањето во јавниот дискурс“, рече Стоилковски.
Според него, „значајно е тоа што стратешките партнери имаат разбирање за македонскиот народ и нивната посебност и многу е важно ова прашање да добие што поширока поддршка, односно да ги поттикне и другите држави и европските институции да донесат документи преку своите институции во поткрепа на многувековната македонска посебност, историја, јазик и култура, односно со еден збор македонскиот идентитет“, додаде Стоилковски за засега само предложената резолуција.
