Премиерот Зоран Заев сѐ уште верува дека ќе се најде решение за отворените прашања со Бугарија. Во интервјуто на „МРТ“, тој ги повика бугарскиот претседател Румен Радев и техничката Влада во Софија „да покажат европска големина кон еден од своите први соседи, Северна Македонија“ и да дадат шанса да продолжи процесот за членство во ЕУ. Притоа, Заев потсети на консензуалната одлука на сите 27 земји-членки на ЕУ, вклучувајќи ја и Бугарија, дека сме ги исполниле условите за почеток на преговорите.
Бугарија да продолжи во духот на европските манири и да го сврти повторно вниманието на Европската Унија кон овој регион, повика премиерот.
„Да продолжиме да градиме пријателство, важно е каква историја пишуваме сега, нашите млади луѓе сакаат да ги отвориме вратите и можностите за соработка, а не да бидеме заглавени во минатото“, рече тој.
Заев повтори дека идентитетот и јазикот не може да се предмет на преговори и дека тоа јасно им го порачал во Брисел на сите европски институции и сите членки.
„За идентитетот и јазикот не се преговара. Тоа што треба да го знае нашиот народ е дека Европа должи. Ние испорачавме сѐ. Северна Македонија е земја која најмногу чекала од сите кои што сакаат да го продолжат европскиот пат. Од сите земји што некогаш биле кандидати, а денес се членки или сѐ уште се кандидати, ние чекаме најмногу – 16 години“, потсети Заев, оценувајќи дека без Северна Македонија ќе биде загрозено проширувањето на ЕУ, кое самата таа го прогласи за своја стратешка цел.
