Новинари од терен во Украина утрово, околу 7:30 часот по локално време, информираа дека во Киев се огласиле сирените за воздушен напад, а властите повикале граѓаните да се упатат во најблиското засолниште, 3 часа откако силни експлозии одекнаа на небото над градот, објави „Гардијан“.
Сирените утрово се огласиле и во градот Лавов, западна Украина.
Во видео обраќањето на украинскиот претседател Володимир Зеленски утрово, тој ги потврди наводите за руски проектили кон Киев. Како што рече тој, воздушните напади почнале во 4:00 часот по локално време. Притоа додаде дека руските трупи, од страна на украинските сили, биле спречени да напредуваат во повеќето правци.
Според Зеленски, руските напади биле упатени и кон воени и кон цивилни цели.
Во обраќањето, на украински и на руски јазик, Зеленски повторно ја повика Русија да прекине со огнот.
„Русија ќе мора да зборува со нас, порано или подоцна, за тоа како да се стави крај на непријателството и да запре оваа инвазија. Колку поскоро почне разговорот, толку помали ќе бидат загубите на Русија“, рече украинскиот претседател.
Зеленски повторно го критикуваше Западот дека не прави доволно да ѝ помогне на Украина.
„Утрово ја браниме нашата држава сами. Како и вчера, најголемите сили во светот гледаат од далечина“, порача тој, потенцирајќи дека воведените санкции не ја предомислуваат Русија.
„Дали вчерашните санкции ја убедија Русија? Слушаме на нашето небо и гледаме на нашата земја дека тоа не беше доволно“, рече украинскиот претседател.
„Додека нападите престанат, ние ќе ја браниме нашата земја сѐ до тој момент“, додаде тој.
