Зошто никогаш нема да сретнеме вонземска цивилизација?

Угледниот британски физичар Брајан Кокс смета дека никогаш нема да запознаеме вонземска цивилизација. Но неговото објаснување не е од оние класичните, дека многу сме оддалечени, или дека вонземјаните немаат интерес да се бават со луѓето (како ние што немаме да се бавиме со црвите).

Кокс, кој патем е познат и како водител на научните емисии “Stargazing Live” и “Wonders of the Universe”, смета дека нашата потрага за интелигентен живот нема да даде резултати, бидејќи е многу веројатно дека вонземските цивилизации веќе се имаат меѓусебно уништено, и тоа заради напредокот во науката. Кокс истото го предвидува и за луѓето.

Ваквата идеја прв пат ја изнесе физичарот Енрико Ферми во 1950-та година. Неговото прашање, познато како Фермиев парадокс, гласело:

„Ако било кој облик на живот со ракетна технологија може да ја колонизира галаксијата за неколку милиони години, зошто уште немаме докази за тоа?“

Едно од решенијата на парадоксот е тезата на Кокс – дека не е можно да се води свет кој има моќ да се самоуништи, и кому му е потребна глобална соработка за тоа да се спречи.

„Можеби напредокот на науката и технологијата неизбежно го кочат развојот на политичката експертиза и водат во пропаст“, смета Кокс.